შეხვედრა საპილოტე პროექტში ჩართულ მანდატურებთან და პედაგოგებთან

განათლებისა და მეცნიერების სამინისტროს საგანმანათლებლო დაწესებულების სამსახურის უფროსმა ლევან აბაშიძემ და ორგანიზაცია PH international-ის წარმომადგენლებმა შუალედური შეხვედრა გამართეს იმ პედაგოგებთან და მანდატურებთან, რომლებიც საპილოტე პროექტში ,,სამართლებრივი კულტურის საწყისების სწავლება მე-7 კლასელებში’’  არიან ჩართულები.

პროექტის ავტორებმა მანდატურებისა და პედაგოგების შეფასებები მოისმინეს-როგორც მათ აღნიშნეს, ბავშვების მხრიდან დაინტერესება საკმაოდ დიდია და აქტიურად არიან ჩართულები გაკვეთილების მიმდინარეობის პროცესში. მათივე თქმით, სამართლებრივი კულტურის გაკვეთილებმა სხვა კლასების და მშობლების დიდი ინტერესიც გამოიწვია.

PH international-ის წარმომადგენლებმა, თავის მხრივ, ის შენიშვნები და რეკომენდაციები გაუზიარეს მანდატურებს, რომლებიც მონიტორინგის შედეგად შეიმუშავეს. მათი თქმით, მანდატურებმა წარმატებით გაართვეს თავი დაკისრებულ მისიას და სამომავლოდ, განათლებისა და მეცნიერების სამინისტროსთან ერთად, 

პროექტის მასშტაბების გაზრდაზე იმუშავებენ.

პროგრამის დახვეწის მიზნით, მანდატურებთან და პედაგოგებთან შეხვედრებს შემფასებელთა ასოციაციის კონსულტანტებიც გამართავენ. პროგრამის მონიტორინგის შედეგების საბოლოო შეფასება მისი დასრულების შემდეგ მოხდება.

საპილოტე პროექტი, რომელიც თბილისის 10 საჯარო სკოლაში ხორციელდება და დანაშაულის პრევენციას და მართლმსაჯულების საკითხების შესახებ მოზარდთა ინფორმირებულობის გაზრდას ემსახურება, დაახლოებით ერთ თვეში დასრულდება.