ქუთაისში ბავშვთა დაცვის ოფიცრების მომზადება დაიწყო

საგანმანათლებლო დაწესებულების მანდატურის სამსახურის რეორგანიზაციის ფარგლებში ქუთაისის მანდატურები  ბავშვთა დაცვის ოფიცრის მოსამზადებელი კურსის პირველ ეტაპს გადიან.  ამ ეტაპზე მომზადდება 80 მდე მანდატური.

ტრენინგები გაეროს ბავშვთა დაცვის ფონდის (UNICEF) დაფინანსებით მიმდინარეობს. კურსი მოიცავს იმ ძირითადი საკითხების სწავლებას, რაც მანდატურებს მოსწავლეთათვის ფიზიკური და ემოციურად უსაფრთხო გარემოს შექმნაში დაეხმარება. ოფიცრებმა უნდა შეძლონ მოსწავლეებთან პრევენციულ დონეზე მუშაობა და მოსწავლეთა ინფორმირება უსაფრთხოების საკითხებზე,  კრიზირული სიტუაციების მართვა, მცირე კონფლიქტების მოგვარება, მოსწავლეთა ქცევითი დარღვევებისა და ფსიქოლოგიური პრობლემების იდენტიფიცირება და საჭიროების შემთხვევაში  ფსიქოლოგიურ ცენტრში, ან შესაბამის სამსახურში  გადამისამართება.

მომზადებაში ფსიქოლოგებს მანდატურის სამსახურის ფსიქოლოგიური ცენტრის მიერ დატრენინგებული ბავშვთა დაცვის ოფიცრები ეხმარებიან.

გადამზადების კურსს ყველა მანდატური ეტაპობრივად გაივლის და 2014 წლიდან სკოლებში მოსწავლეთა უსაფრთხოებაზე მაღალი კვალიფიკაციის მქონე ბავშვთა დაცვის ოფიცრები იზრუნებენ.