სამართლებრივი განათლების პროგრამაში რეგიონების სკოლებიც ჩაერთვებიან

საგანმანათლებლო დაწესებულების მანდატურის სამსახურისა და ამერიკული არასამთავრობო ორგანიზაცია PH international-ის სამართლებრივი განათლების ერთობლივი პროგრამა თბილისის გარდა რეგიონების საჯარო სკოლებშიც განხორციელდება.

პროგრამა ითვალისწინებს შერჩეული სკოლების მანდატურებისა და პედაგოგების მომზადებას სამართლებრივი კულტურის საწყისებში. სამოქალაქო განათლების ექსპერტებმა, ფსიქოლოგებმა და სამართალმცოდნეებმა ფოთის, თელავის, ხაშურისა და ახალციხის 20 სკოლის მანდატურებსა და პედაგოგებს ინტენსიური ტრენინგები ჩაუტარეს ისეთ საკითხებში, როგორიცაა: მოზარდი და მისი ფსიქო-სოციალური განვითარება, ძალადობის რაობა, არასრულწლოვანი და კანონი, სასკოლო კონფლიქტების მართვა და ა.შ.

გადამზადებული მანდატურები და პედაგოგები მომავალი სასწავლო წლიდან მე-7 კლასელ მოსწავლეებს ყოველკვირეულად ჩაუტარებენ ერთობლივ გაკვეთილებს სამართლებრივი კულტურის საწყისებში.

სამართლებრივი განათლების პროგრამა სკოლებში დანაშაულის პრევენციას და მართლმსაჯულების საკითხების შესახებ მოზარდთა ინფორმირებულობის გაზრდას ემსახურება.