02.09.2019

სასწავლო წლის დასაწყისში, მანდატურის სამსახური დამატებით 41 საჯარო სკოლაში შევა

მანდატურობის კანდიდატთა ახალმა ნაკადმა წარმატებით დაასრულა 2 თვიანი მოსამზადებელი კურსი შსს-ს აკადემიაში. ახალი სასწავლო წლიდან, ისინი საქართველოს სხვადასხვა რეგიონის სკოლებში გადანაწილდებიან.

109 ახალ თანამშრომელს მანდატურის სამსახურის უფროსი გელა გელაძე შეხვდა, მათ მოსამზადებელი კურსის გავლის დამადასტურებელი სერთიფიკატები გადასცა და წარმატებები უსურვა.

2019-2020 სასწავლო წლის დასაწყისში, მანდატურის სამსახური დამატებით 41 საჯარო სკოლაში იქნება წარმოდგენილი: შიდა ქართლში, ქვემო ქართლში, სამეგრელოში, მცხეთა-მთიანეთში, კახეთსა და რაჭაში. სულ, მანდატურის სამსახურის მომსახურებით, სასწავლო პროცესის დაწყებისას, საქართველოს მასშტაბით, 527 საჯარო სკოლა ისარგებლებს.

მიმდინარე წლის ბოლომდე, მანდატურის სამსახური კიდევ 61 საჯარო სკოლაში შევა.