მანდატურის სამსახურს ლიუვენის კრიმინოლოგიის ინსტიტუტის პროფესორი ივო ატსენი ეწვია

საგანმანათლებლო დაწესებულების მანდატურის სამსახურს, სამუშაო ვიზიტით, ბელგიის ქალაქ ლუვენის კრიმინოლოგიის ინსტიტუტის წარმომადგენელი, ივო ატსენი ეწვია. ბელგიელი პროფესორი მანდატურის სამსახურის უფროსის მოადგილეს, ნინო შატბერაშვილს და ფსიქო-სოციალური მომსახურების ცენტრის თანამშრომლებს შეხვდა.

შეხვედრის მთავარი თემა სასკოლო მედიაცია იყო. ევროპელი ექსპერტი მანდატურის სამსახურის მიერ შემუშავებულ მედიაციის კონცეფციის პროექტს გაეცნო და შესაბამისი რეკომენდაციებიც წარმოადგინა.

საქართველოში სასკოლო მედიაციის მექანიზმის დანერგვას მანდატურის სამსახური მიმდინარე წლის სექტემბრიდან გეგმავს. ამ მიზნით, ის მჭიდროდ თანამშრომლობს ამ დარგის ევროპელ სპეციალისტებთან და პრაქტიკოს მედიატორებთან. 

სასკოლო მედიაციის მიზანია, ადრეული და ეფექტური ჩარევით, კონფლიქტური სიტუაციის მშვიდობიანი გადაწყვეტა. ეს არის ინოვაციური მიდგომა საქართველოს საგანმანათლებლო სივრცეში, რომელიც წარმატებულ დასავლურ პრაქტიკას ეფუძნება და წარმოადგენს სკოლაში ბულინგსა და უთანხმოებებზე რეაგირების ეფექტიან მექანიზმს.