ევროკავშირის პროექტის ექსპერტი თიმ ჩეფმენი, სასკოლო მედიაციის თემაზე, ტრენინგს ატარებს

საგანმანათლებლო დაწესებულების მანდატურის სამსახურის ორგანიზებითა და ევროკავშირის სასამართლო რეფორმის მხარდამჭერი პროექტის ხელშეწყობით, ფსიქო-სოციალური მომსახურების ცენტრის თანამშრომლებისა და საპილოტე სკოლების პედაგოგებისთვის, სასკოლო მედიაციის თემაზე, 2 დღიანი ტრენინგი დაიწყო. სემინარს ევროკავშირის პროექტის ექსპერტი, აღდგენითი მართლმსაჯულების ევროპული ფორუმის თავმჯდომარე თიმ ჩეფმენი უძღვება. ტრენინგის მთავარი თემებია: აღდგენით პროცესებზე დაფუძნებული სკოლა და რთულ ქცევასთან გამკლავება აღდგენითი მეთოდებით.

ტრენინგის დაწყების წინ გამართულ სამუშაო შეხვედრაზე, მანდატურის სამსახურის უფროსმა საგანმანათლებლო სივრცეში სასკოლო მედიაციის მნიშვნელობაზე ისაუბრა და ევროკავშირს აღნიშნული პროექტის მხარდაჭერისთვის მადლობა გადაუხადა: „მანდატურის სამსახური, ევროპელ ექსპერტებთან მჭიდრო თანამშრომლობითა და ევროკავშირის მხარდაჭერით, აქტიურად მუშაობს სასკოლო მედიაციის კონცეფციასა და სტანდარტულ გეგმაზე. სასკოლო მედიაცია არის ინოვაციური მიდგომა საქართველოს საგანმანათლებლო სივრცეში და უაღრესად ეფექტიანი მექანიზმი სკოლაში ბულინგსა და უთანხმოებებზე რეაგირებისთვის. იმედი მაქვს, რომ ეს იქნება ერთ-ერთი ის შედეგიანი და წარმატებული პროექტი, რომელსაც საგანმანათლებლო დაწესებულების მანდატურის სამსახური მიმდინარე რეფორმის ფარგლებში ახორციელებს და რომლის მიზანია, მივიღოთ უსაფრთხო და ზრუნვაზე ორიენტირებული სკოლა,“ – აღნიშნა გელა გელაძემ.

სასკოლო მედიაციის კონცეფციის დანერგვას მანდატურის სამსახური საპილოტე სკოლებში მიმდინარე სასწავლო სემესტრიდან გეგმავს. 2020 წლის სექტემბრიდან კი, სასკოლო მედიაციის მექანიზმი საქართველოს ყველა საჯარო სკოლაში ამოქმედდება.