საგანმანათლებლო დაწესებულების მანდატურები ძალადობის პრევენციის თემაზე საჯარო სკოლების მოსწავლეებთან ონლაინ შეხვედრებს მართავენ

ახალი სასწავლო წლის დაწყებისთანავე, საგანმანათლებლო დაწესებულების მანდატურებმა საჯარო სკოლების მოსწავლეებთან საინფორმაციო-საგანმანათლებლო შეხვედრების გამართვა დაიწყეს. ონლაინ შეხვედრები საქართველოს ყველა იმ საჯარო სკოლაში ტარდება, სადაც მანდატურის სამსახურია წარმოდგენილი.

მანდატურები მოსწავლეებს ძალადობის ფორმების, განსაკუთრებით - კიბერბულინგის არსის და მასთან გამკლავების გზების შესახებ ესაუბრებიან. ტრენინგ-მოდული მანდატურის სამსახურის ფსიქოსოციალური მომსახურების ცენტრის მიერ არის შემუშავებული.

აღნიშნული შეხვედრების მიზანია მოსწავლეთა ცნობიერების ამაღლება და ნებისმიერი ძალადობრივი ქმედების, მათ შორის, კიბერბულინგის პრევენცია.

ამ ეტაპზე, საინფორმაციო შეხვედრებში საჯარო სკოლების VII-IX კლასების მოსწავლეები მონაწილეობენ. სასწავლო წლის დაწყებიდან დღემდე, მთელი საქართველოს მასშტაბით, უკვე 700-მდე  შეხვედრა ჩატარდა.

ძალადობის პრევენციის მიზნით, საინფორმაციო-საგანმანათლებლო შეხვედრები მოსწავლეებთან აქტიურად გრძელდება.