მანდატურის სამსახურმა თანასწორობის კვირეულის აღნიშვნა მრავალფეროვანი ღონისძიებებით დაიწყო

საგანმანათლებლო დაწესებულების მანდატურის სამსახურის წარმომადგენლებმა, საქართველოს საჯარო სკოლებში, თანასწორობისა და ტოლერანტობის თემებზე მრავალფეროვანი საინფორმაციო და შემეცნებითი ღონისძიებები გამართეს. შეხვედრები სკოლის მოსწავლეებთან თანასწორობის კვირეულის ფარგლებში მიმდინარეობს, რომელსაც ევროპის საბჭო, პარტნიორ ორგანიზაციებთან და უწყებებთან ერთად, ყოველწლიურად აღნიშნავს. 

ტრენერად გადამზადებული მანდატურები და დაგეგმარებისა და ანალიზის სამმართველოს კოორდინატორები მოსწავლეებს ნეგატიური სტერეოტიპების, ქსენოფობიის, დისკრიმინაციის და სიძულვილის ენის დაძლევის გზებზე ესაუბრნენ. შეხვედრები ინტერაქციულ რეჟიმში წარიმართა. ტრენერებთან ერთად, მოზარდებმა შეასრულეს სავარჯიშოები, რომლებიც მაქსიმალურად უწყობს ხელს შემოქმედებითი უნარებისა და კრიტიკული აზროვნების განვითარებას.

საგანმანათლებლო დაწესებულების მანდატურის სამსახური თანასწორობის კვირეულის აღნიშვნაში, უკვე მეოთხე წელია, აქტიურად არის ჩართული. მიმდინარე კვირეულის ფარგლებშიც, საგანმანათლებლო დაწესებულების მანდატურები, ფსიქოლოგები და სოციალური მუშაკები არაერთ მნიშვნელოვან საინფორმაციო-საგანმანათლებლო და კულტურულ-შემეცნებით ღონისძიებას ჩაატარებენ.