მანდატურის სამსახურის ფსიქოსოციალური მომსახურების ცენტრმა ბავშვთა საკითხებზე მომუშავე ორგანიზაციებთან სამუშაო შეხვედრა გამართა

საგანმანათლებლო დაწესებულების მანდატურის სამსახურის ფსიქოსოციალური მომსახურების ცენტრმა საქართველოში მოქმედ საერთაშორისო, პროფილური სახელმწიფო და არასამთავრობო ორგანიზაციების წარმომადგენლებს ცენტრის მიერ ბოლო 6 თვეში განხორციელებული საქმიანობის შედეგები და მიმდინარე პროექტები გააცნო. შეხვედრის მონაწილეები ასევე გაეცნენ საპილოტე სკოლებში განხორციელებული კვლევის შედეგებს. ფსიქოსოციალური მომსახურების ცენტრის მიერ, კვლევის დასაწყისში საპილოტე სკოლებში საბაზისო მონაცემები შეგროვდა, ხოლო დასასრულს - ამ მონაცემებთან მიმართებით ჩარევის ეფექტი გაიზომა.

ონლაინ შეხვედრას მანდატურის სამსახურის უფროსის მოადგილე ნინო შატბერაშვილი, ფსიქოსოციალური მომსახურების ცენტრის უფროსი მარიამ დავითაშვილი, ცენტრის სოციალური მუშაობის მენეჯერი ნათია მაჭარაშვილი, ფსიქოლოგები, სოციალური მუშაკები და იმ საჯარო სკოლების წარმომადგენლები ესწრებოდნენ, სადაც ფსიქოსოციალური მომსახურების ცენტრის საპილოტე პროგრამა განხორციელდა და სადაც, მოცემული მომენტისთვის, მანდატურის სამსახურის სოციალური მუშაკები არიან წარმოდგენილნი.  

საგანმანათლებლო დაწესებულების მანდატურის სამსახურის ფსიქოსოციალური მომსახურების ცენტრის ინიციატივითა და ორგანიზებით, მსგავსი შეხვედრები საერთაშორისო ორგანიზაციებთან, სახელმწიფო და არასამთავრობო სექტორთან  სისტემატურად იმართება.