საგანმანათლებლო დაწესებულების მანდატურის სამსახური სკოლებში აღდგენითი პრაქტიკის დანერგვის პროექტს აგრძელებს

საგანმანათლებლო დაწესებულების მანდატურის სამსახურის ფსიქოსოციალური მომსახურების ცენტრი, გაეროს ბავშვთა ფონდის მხარდაჭერით შერჩეულ სკოლებში, ახალი ინიციატივის განხორციელებას აგრძელებს.

პროექტი საგანმანათლებლო დაწესებულებებში აღდგენითი პრაქტიკის დანერგვას გულისხმობს და მიზნად ისახავს სასკოლო სივრცეში კონფლიქტების პოზიტიურად და ეფექტიანად მოგვარების და უსაფრთხო გარემოს განმტკიცების ხელშეწყობას, კომუნიკაციის უნარ-ჩვევების გაუმჯობესებას, ჯანსაღი ურთიერთობების დამყარებას, შენარჩუნებასა და აღდგენას.

პროექტის განხორციელებაში მონაწილეობენ კონფლიქტების ტრანსფორმაციის ცენტრისა და აღდგენითი მიდგომების ეროვნული ცენტრის დირექტორი ბელინდა ჰოპკინსი და აღდგენითი მართლმსაჯულების საბჭოს მიერ აკრედიტირებული ექსპერტი კრისტოფერ სტრაკერი. ბრიტანელი ექსპერტები ტრენინგთა ციკლს ხელმძღვანელობენ.

მიმდინარე ტრენინგში ფსიქოსოციალური მომსახურების ცენტრის სოციალური მუშაკები და იმ სკოლების ადმინისტრაციის წარმომადგენლები მონაწილეობენ, სადაც მანდატურის სამსახური სოციალური მუშაობის კომპონენტითაა წარმოდგენილი.