12.04.2023

გიორგი ამილახვარმა საგანმანათლებლო დაწესებულების მანდატურის სამსახურის თანამშრომლები დააჯილდოვა

საგანმანათლებლო დაწესებულების მანდატურის სამსახურის დაარსების დღესთან დაკავშირებით, საქართველოს განათლებისა და მეცნიერების მინისტრმა გიორგი ამილახვარმა მანდატურებს, ფსიქოლოგებსა და სოციალურ მუშაკებს უმასპინძლა.

მინისტრმა დამსწრე საზოგადოებას სიტყვით მიმართა, განსაკუთრებული ყურადღება გაამახვილა  სკოლებში, უსაფრთხო საგანმანათლებლო გარემოს უზრუნველყოფის კუთხით, მანდატურის სამსახურის მნიშვნელობაზე და მანდატურებს, ფსიქოლოგებსა და სოციალურ მუშაკებს გაწეული საქმიანობისთვის მადლობის სიგელები გადასცა.

გიორგი ამილახვარი: „ბოლო წლებში განხორციელებული მასშტაბური ინიციატივების შედეგად, დღეს მანდატურის სამსახური განათლების სისტემაში ერთ-ერთ გამორჩეულ, მოსწავლეზე ორიენტირებულ უმნიშვნელოვანეს ინსტიტუტს წარმოადგენს, რომელიც ყოველდღიურ რეჟიმში ზრუნავს ჩვენი შვილების უსაფრთხოებაზე.

მინდა, მადლობა გადავუხადო თითოეულ მანდატურს, ფსიქოლოგსა და სოციალურ მუშაკს თავდაუზოგავი შრომისთვის. სწორედ ამ ადამიანებს მიუძღვით უდიდესი როლი სკოლებში ჯანსაღი, მზრუნველი და მეგობრული გარემოს შექმნის საქმეში, რაც ჩვენს მოსწავლეებს საკუთარი შესაძლებლობებისა და ცოდნის სრულად გამოვლენისა და რეალიზების საშუალებას აძლევს.“

საგანმანათლებლო დაწესებულების მანდატურის სამსახურის თანამშრომელთა დაჯილდოების ღონისძიებას საქართველოს განათლებისა და მეცნიერების მინისტრის მოადგილე გელა გელაძე, სსიპ საგანმანათლებლო დაწესებულების მანდატურის სამსახურის უფროსის მოვალეობის შემსრულებელი სოფიო აბულაშვილი და სამსახურის სხვადასხვა მიმართულების ხელმძღვანელები ესწრებოდნენ. 

საგანმანათლებლო დაწესებულების მანდატურის სამსახურის დაარსების დღე ყოველწლიურად 15 აპრილს აღინიშნება.