საგანმანათლებლო დაწესებულების მანდატურებმა ადამიანის უფლებათა სწავლების სფეროში ტრენერთა ტრენინგი გაიარეს

საგანმანათლებლო დაწესებულების მანდატურის სამსახური, საქართველოში ევროპის საბჭოს ოფისთან მჭიდრო თანამშრომლობით, ადამიანის უფლებების სწავლების სფეროში ტრენერთა მომზადებას განაგრძობს.

ტრენერთა ტრენინგი ადამიანის უფლებების თემაზე საგანმანათლებლო დაწესებულების კიდევ 28 მანდატურმა გაიარა.

ტრენინგის დახურვას საგანმანათლებლო დაწესებულების მანდატურის სამსახურის უფროსი სოფიო აბულაშვილი დაესწრო. მან ევროპის საბჭოს მრავალწლიანი მჭიდრო და ნაყოფიერი თანამშრომლობისთვის მადლობა გადაუხადა და ტრენინგის მონაწილეებს წარმატებები უსურვა.

საგანმანათლებლო დაწესებულების მანდატურები, როგორც თეორიული, ისე პრაქტიკული სწავლების გამოყენებით, დეტალურად გაეცნენ ისეთ საკითხებს, როგორიცაა: დისკრიმინაციული ქცევის ფსიქოლოგია: ბავშვთან ურთიერთობის თავისებურებები და არადისკრიმინაციული კომუნიკაცია; სიძულვილის ენა; ზღვარი გამოხატვის თავისუფლებასა და სიძულვილის ენას შორის; ევროპის საბჭოს ინსტრუმენტები ადამიანის უფლებების სწავლების სფეროში და სხვა. 

ტრენინგს საგანმანათლებლო დაწესებულების მანდატურის სამსახურის ტრენერები, ევროპის საბჭოს ექსპერტების - ქეთი თავართქილაძისა და ნატო ანთიას მენტორობით უძღვებოდნენ.

ტრენინგები ჩატარდა ევროპის საბჭოს ოფისის მხარდაჭერით, პროექტის „თანასწორობის დაცვისა და დისკრიმინაციის დაუშვებლობის ეფექტური მექანიზმების ხელშეწყობა საქართველოში“ ფარგლებში.