მანდატურის სამსახური რეგიონების სკოლებისთვის ინტელექტუალურ-შემეცნებითი ღონისძიებების გამართვას აგრძელებს

საგანმანათლებლო დაწესებულების მანდატურის სამსახური, ევროპის საბჭოს „თანასწორობის კვირეულის“ ფარგლებში, რეგიონების საჯარო სკოლების მოსწავლეებისთვის ინტელექტუალურ-შემეცნებითი ღონისძიებების გამართვას აგრძელებს.

თანასწორობისა და ტოლერანტობის თემაზე გამართულ ინტელექტუალურ თამაშს ამჯერად ახალციხემ უმასპინძლა. ახალციხის N1, N2, N5 და N6 საჯარო სკოლების მე-10 კლასის მოსწავლეებისგან დაკომპლექტებულმა გუნდებმა ადამიანის უფლებებთან, თანასწორობასთან და ცნობილ ისტორიულ მოვლენებთან დაკავშირებულ შეკითხვებს უპასუხეს.

ინტელექტუალურ შეჯიბრში გამარჯვება ღონისძიების მასპინძელმა, N1 საჯარო სკოლის გუნდმა მოიპოვა.

თამაშის გამარჯვებულ და მონაწილე გუნდებს, საგანმანათლებლო დაწესებულების მანდატურის სამსახურისა და ევროპის საბჭოს სახელით, სერტიფიკატები, სამახსოვრო საჩუქრები და ვაუჩერები გადაეცათ.