საგანმანათლებლო დაწესებულების მანდატურის სამსახურს ტაჯიკეთის დელეგაცია ეწვია

საგანმანათლებლო დაწესებულების მანდატურის სამსახურს ტაჯიკეთის არასრულწლოვანთა მართლმსაჯულების უწყებათაშორისი სამუშაო ჯგუფის წევრებისგან დაკომპლექტებული დელეგაცია ეწვია.

დელეგაციის წევრებს სსიპ საგანმანათლებლო დაწესებულების მანდატურის სამსახურის უფროსი სოფიო აბულაშვილი და მანდატურის სამსახურის სხვა წარმომადგენლები შეხვდნენ.

ტაჯიკეთის დელეგაციის სასწავლო ვიზიტის მიზანს არასრულწლოვანთა მართლმსაჯულების, განრიდება/მედიაციის პროგრამის, დანაშაულის პრევენციის და მასთან დაკავშირებული საკითხების გაცნობა წარმოადგენდა.

სამუშაო შეხვედრაზე ქართულმა მხარემ ტაჯიკეთის წარმომადგენლებს საგანმანათლებლო დაწესებულების მანდატურის სამსახურის საქმიანობის სპეციფიკა, რეაგირების მექანიზმები, ძალადობისა და არასრულწლოვანთა დანაშაულის პრევენციის მიმართულებით განხორციელებული პროექტები, მიღწეული შედეგები და მიმდინარე პროგრამები გააცნო. განსაკუთრებული ყურადღება დაეთმო სასკოლო მედიაციასა და სკოლებში სოციალური მუშაობის კომპონენტებს, ასევე, ფსიქოსოციალური მომსახურების მხარდამჭერ სერვისებს.

ტაჯიკეთის დელეგაციის სამუშაო ვიზიტი საქართველოში გაეროს ბავშვთა ფონდის მხარდაჭერით განხორციელდა.