მანდატურის სამსახურმა დაუნის სინდრომის მსოფლიო დღე სკოლებში მრავალფეროვანი ღონისძიებებით აღნიშნა

დაუნის სინდრომის შესახებ ცნობიერების ამაღლების მსოფლიო დღესთან დაკავშირებით, საგანმანათლებლო დაწესებულების მანდატურის სამსახურის ფსიქოსოციალური მომსახურების ცენტრის სოციალურმა მუშაკებმა საჯარო სკოლებში მრავალფეროვანი საინფორმაციო-შემეცნებითი ღონისძიებები გამართეს. აქტივობებში დედოფლისწყაროს, ფოთის, ხაშურის, გორისა და ამბროლაურის იმ საჯარო სკოლების მოსწავლეები მონაწილეობდნენ, სადაც მანდატურის სამსახური სოციალური მუშაობის კომპონენტითაა წარმოდგენილი. სოციალური მუშაკების მხარდაჭერით, მოსწავლეებმა მოამზადეს დაუნის სინდრომის მსოფლიო დღესთან დაკავშირებული პოსტერები, ნახატები და პრეზენტაციები.

დაუნის სინდრომის შესახებ ცნობიერების ამაღლების მსოფლიო დღე ყოველწლიურად, 21 მარტს აღინიშნება. საგანმანათლებლო დაწესებულების მანდატურის სამსახური უერთდება წლევანდელ მთავარ გზავნილს - „გააუმჯობესე ჩვენი მხარდამჭერი სისტემები“ და აგრძელებს ზრუნვას განსაკუთრებული საჭიროებების მქონე ბავშვების განათლების მხარდამჭერი მომსახურებების განვითარებისა და გაძლიერების მიზნით, რათა ინკლუზიურ გარემოში, დაუნის სინდრომის მქონე ბავშვებს ხარისხიანი განათლების მიღების, პიროვნული და პროფესიული განვითარებისა და წინსვლის სრულფასოვანი შესაძლებლობები ჰქონდეთ.