მანდატურის სამსახურმა სოციალური მუშაობის საერთაშორისო კვირეული სკოლებში საინფორმაციო-შემეცნებითი ღონისძიებებით აღნიშნა

სოციალური მუშაობის საერთაშორისო დღესთან დაკავშირებით გამართული კვირეულის ფარგლებში, სსიპ საგანმანათლებლო დაწესებულების მანდატურის სამსახურის ფსიქოსოციალური მომსახურების ცენტრის სოციალურმა მუშაკებმა თბილისისა და რეგიონების საჯარო სკოლებში საინფორმაციო-შემეცნებითი ღონისძიებები ჩაატარეს.

სოციალური მუშაკების ორგანიზებით, მოეწყო ფილმის ჩვენება და გაიმართა საინფორმაციო შეხვედრა-დისკუსიები, რომელშიც სხვადასხვა საფეხურის მოსწავლეები და მასწავლებლები მონაწილეობდნენ. შეხვედრებზე ისაუბრეს ისეთ თემებზე, როგორიცაა: სოციალური მუშაკის როლი სასკოლო საზოგადოების ცხოვრებაში; სოციალური მუშაობა - დახმარება, მხარდაჭერა და ცვლილება; სოციალური სამართლიანობა და დისკრიმინაცია.

ღონისძიებების მიზანია მოსწავლეების, მასწავლებლებისა და სასკოლო ცხოვრებაში ჩართული სხვა პირების ცნობიერების ამაღლება სოციალური მუშაობის მნიშვნელობის შესახებ და სოციალური მუშაკის პროფესიის პოპულარიზაცია.