საგანმანათლებლო დაწესებულების მანდატურის სამსახურის ინიციატივით სკოლებში ბავშვთა დაცვის დღისადმი მიძღვნილი კვირეული იმართება

საგანმანათლებლო დაწესებულების მანდატურის სამსახურის სოციალური მუშაკების ორგანიზებით სკოლებში ბავშვთა დაცვის დღისადმი მიძღვნილი კვირეული მიმდინარეობს.

კვირეულის ფარგლებში თბილისსა და რეგიონებში, მოსწავლეების მონაწილეობით, სხვადასხვა მრავალფეროვანი, შემეცნებითი, სახალისო და სპორტული ღონისძიება იმართება. მათ შორის – მხიარული სტარტები, სამაგიდე თამაშები, ნახატების გამოფენა, ვიდეორგოლისა და პოსტერების მომზადება.

ამასთან, მშობელთა ჩართულობით ტარდება საინფორმაციო შეხვედრებიც. კვირეულის ჩატარების მიზანია ბავშვთა უფლებების დაცვისა და ინკლუზიის მნიშვნელობის ხაზგასმა, ბავშვთა კეთილდღეობის აუცილებლობის აღიარება და ბავშვთა ფუნდამენტურ უფლებებთან დაკავშირებით საზოგადოების ცნობიერების ამაღლება.