საგანმანათლებლო დაწესებულების მანდატურებმა ოჯახში ძალადობისა და ქალთა მიმართ ძალადობის იდენტიფიცირების, რეაგირებისა და პრევენციის საკითხებზე ონლაინ ტრენინგი გაიარეს

საგანმანათლებლო დაწესებულების მანდატურის სამსახურის შიდა ქართლის, იმერეთის, სამეგრელოსა და კახეთის რეგიონული ცენტრების 429 მანდატურმა ოჯახში ძალადობის, ქალთა მიმართ ძალადობის, ადრეული ქორწინებისა და ტექნოლოგიების გამოყენებით ჩადენილი ძალადობის იდენტიფიცირების, რეაგირებისა და პრევენციის საკითხებზე ონლაინ ტრენინგი გაიარა.

ტრენინგზე დეტალურად განიხილეს ისეთი თემები, როგორიცაა: ოჯახში ძალადობის თავისებურებები, ციკლი და დინამიკა; ბავშვზე ოჯახში ძალადობის ფორმები, რისკ-ფაქტორები და შედეგები; მსხვერპლის იდენტიფიცირება - საფრთხის სიგნალები; ქალთა მიმართ და ოჯახში ძალადობის შესახებ საქართველოს კანონმდებლობის განვითარების ძირითადი ეტაპები და აღნიშნული სფეროს  მარეგულირებელი ძირითადი საერთაშორისო და რეგიონული ინსტრუმენტები; ძალადობის ფორმები და მათი იდენტიფიცირების სირთულეები; ადრეული ქორწინება და მასთან ბრძოლის მექანიზმები და ეფექტიანი კომუნიკაციის ძირითადი პრინციპები.

ტრენინგებს გაეროს ქალთა ორგანიზაციის მიერ ტრენერად გადამზადებული, საგანმანათლებლო დაწესებულების მანდატურის სამსახურის დაგეგმარებისა და ანალიზის სამმართველოს კოორდინატორი და საგანმანათლებლო დაწესებულების ტრენერი მანდატურები უძღვებოდნენ. 

ტრენინგები სსიპ საგანმანათლებლო დაწესებულების მანდატურის სამსახურსა და გაეროს ქალთა ორგანიზაციას შორის თანამშრომლობის ფარგლებში ხორციელდება.