მანდატურის სამსახურის თანამშრომლებმა ადამიანის უფლებათა სწავლების ტრენერთა ტრენინგი გაიარეს

მანდატურის სამსახურის ფსიქოსოციალური მომსახურების ცენტრის სოციალურმა მუშაკებმა და საგანმანათლებლო დაწესებულების მანდატურებმა ადამიანის უფლებათა სწავლებაზე ტრენერთა ტრენინგში მიიღეს მონაწილეობა.

ღონისძიება საგანმანათლებლო დაწესებულების მანდატურის სამსახურის უფროსმა, პავლე მაჭარაშვილმა, ევროპის საბჭოს საქართველოს ოფისის ხელმძღვანელის მოადგილე სვეტისლავ პაუნოვიჩთან ერთად გახსნა.

ტრენინგები ევროპის საბჭოს ოფისის მხარდაჭერით ჩატარდა, პროექტის „თანასწორობის გაძლიერება და დისკრიმინაციის დაუშვებლობა საქართველოში“ ფარგლებში.

ტრენინგებს უძღვებოდნენ ევროპის საბჭოს ექსპერტი და მანდატურის სამსახურის ტრენერად მომზადებული თანამშრომლები. სასწავლო პროგრამის ფარგლებში მონაწილეებმა დეტალურად განიხილეს ისეთი მნიშვნელოვანი თემები, როგორებიცაა სტერეოტიპები, სტიგმა და დისკრიმინაცია; ბულინგი და კიბერბულინგი; ეფექტიანი ფასილიტაცია; ბავშვთან ურთიერთობის თავისებურებები და სიძულვილის ენა.