ფსიქოაქტიური ნივთიერებების ავადმოხმარების პრევენციის კამპანია „მე მომავალში“ გრძელდება

საქართველოს შინაგან საქმეთა სამინისტროსა და განათლების, მეცნიერებისა და ახალგაზრდობის სამინისტროს ორგანიზებით დაწყებული ფსიქოაქტიური ნივთიერებების ავადმოხმარების პრევენციის ერთობლივი კამპანია „მე მომავალში“ აქტიურად მიმდინარეობს მთელი ქვეყნის მასშტაბით.

კამპანიის მიზანია მოზარდებში ჯანსაღი ცხოვრების წესის პოპულარიზაცია და ფსიქოაქტიური ნივთიერებების მოხმარების პრევენცია.

მანდატურის სამსახურის სპეციალისტებმა და მართლწესრიგის ოფიცრებმა უკვე გამართეს საინფორმაციო შეხვედრები ქვეყნის მასშტაბით 43 საჯარო სკოლაში, სადაც მონაწილეობა მიიღო 2330-მა 11-14 წლის მოსწავლემ. შეხვედრებზე  საგანმანათლებლო დაწესებულების მანდატურის სამსახურის თანამშრომლები და შინაგან საქმეთა სამინისტროს მართლწესრიგის ოფიცრები, მოსწავლეებს ესაუბრებიან ფსიქოაქტიური ნივთიერებების მავნე ზემოქმედებისა და ჯანსაღი ცხოვრების წესის მნიშვნელობაზე.

შეხვედრები მიმდინარეობს მოსწავლეთა ინტერაქციული ჩართულობით და იმართება სხვადასხვა ფორმატის შემეცნებითი აქტივობები, რომლებიც ხელს უწყობს მათ აქტიურ ჩართულობას და ცნობიერების ამაღლებას ჯანსაღი ცხოვრების მნიშვნელობის შესახებ.

საინფორმაციო შეხვედრების პარალელურად, დაგეგმილია კონკურსების, ვიქტორინების, სპორტული ღონისძიებებისა და სხვა შემეცნებითი აქტივობების ჩატარება, რომლებიც მოზარდებში წაახალისებს ჯანსაღი ცხოვრების წესის დამკვიდრებას და გააძლიერებს მათ პასუხისმგებლობას საკუთარი ჯანმრთელობისა და მომავლის მიმართ.

კამპანია დასრულდება 21 დეკემბერს ბათუმში ფინალური ღონისძიებითა და გამარჯვებულთა დაჯილდოებით.