„თანასწორობის კვირეულის“ ფარგლებში საჯარო სკოლებში საინფორმაციო-შემეცნებითი შეხვედრები გაიმართა

საგანმანათლებლო დაწესებულების მანდატურის სამსახურის ინიციატივით, „თანასწორობის კვირეულის“ ფარგლებში, თბილისისა და საქართველოს სხვადასხვა რეგიონის საჯარო სკოლებში მე-7, მე-8 კლასის მოსწავლეებისთვის საინფორმაციო-საგანმანათლებლო შეხვედრები გაიმართა.

მანდატურის სამსახურის წარმომადგენლებმა მოსწავლეებთან ადამიანის უფლებების, მათ შორის, ტოლერანტობისა და თანასწორობის საკითხები განიხილეს; შეხვედრა დისკუსიის  რეჟიმში წარიმართა და ახალგაზრდებს შესაძლებლობა ჰქონდათ მათთვის საინტერესო თემებზე დეტალური ინფორმაცია მიეღოთ.

საინფორმაციო შეხვედრების დასრულების შემდეგ კი, მოსწავლეების მიერ თანასწორობის თემატიკაზე შესრულებული პრეზენტაციების, ნახატებისა და პოსტერების გამოფენა გაიმართა.

„თანასწორობის კვირეულს“ მანდატურის სამსახური ყოველწლიურად სხვადასხვა საგანმანათლებლო, შემეცნებითი და შემოქმედებითი აქტივობით უერთდება, რაც ხელს უწყობს სკოლებში ინკლუზიური, მეგობრული და თანასწორი გარემოს განვითარებას.