ფსიქოაქტიური ნივთიერებების პრევენციის კამპანია „მე მომავალში“ საქართველოს მასშტაბით აქტიურად მიმდინარეობს

ფსიქოაქტიური ნივთიერებების ავადმოხმარების პრევენციის კამპანია „მე მომავალში“, რომელიც შინაგან საქმეთა სამინისტროსა და განათლების, მეცნიერებისა და ახალგაზრდობის სამინისტროს ერთობლივი ინიციატივით დაიწყო მთელი ქვეყნის მასშტაბით აქტიურად მიმდინარეობს.

საინფორმაციო შეხვედრებში ქვეყნის მასშტაბით 52 საჯარო სკოლაში, 3000-მდე 11-14 წლის მოსწავლემ მიიღო მონაწილეობა. მანდატურის სამსახურის სპეციალისტები და მართლწესრიგის ოფიცრები შეხვედრების განმავლობაში მოსწავლეებს ესაუბრებიან ისეთ თემებზე როგორიცაა: ჯანსაღი ცხოვრების წესი, ასერტულობა, პასუხისმგებლიანი ქცევის განმტკიცება, სოციალური წნეხის ამოცნობა და გააზრება. სესიები, გარდა თეორიული ნაწილისა მოიცავს პრაქტიკულ ნაწილს, რაც გულისხმობს როლურ თამაშებს, დისკუსიას, ანიმაციური ვიდეორგოლის ჩევენებასა და განხილვას.

საინფორმაციო შეხვედრების დასრულების შემდეგ, კამპანიის ფარგლებში, დაგეგმილია კომიქსების, ესეების კონკურსის, ვიქტორინისა და სპორტული ღონისძიებების ჩატარება.

კამპანიის მთავარი მიზანი მოზარდ თაობაში ჯანსაღი ცხოვრების წესის პოპულარიზაცია და ფსიქოაქტიური ნივთიერებების ავადმოხმარების პრევენციაა.