ფსიქოაქტიური ნივთიერებების ავადმოხმარების პრევენციის კამპანიის „მე მომავალში“ ფარგლებში საინფორმაციო შეხვედრები დასრულდა

საქართველოს განათლების, მეცნიერებისა და ახალგაზრდობის სამინისტროსა  და საქართველოს შინაგან საქმეთა სამინისტროს ერთობლივი ინიციატივით დაწყებული ფსიქოაქტიური ნივთიერებების ავადმოხმარების პრევენციის ერთობლივი კამპანიის – „მე მომავალში“ ფარგლებში საინფორმაციო შეხვედრები დასრულდა.

მანდატურის სამსახურის სპეციალისტებმა და მართლწესრიგის ოფიცრებმა, მთელი ქვეყნის მასშტაბით 60 საჯარო და 2 კერძო სკოლაში გამართეს საინფორმაციო შეხვედრები, სადაც  3300-მდე VI-IX კლასის (11-14 წელი) მოსწავლეს მიეწოდა ინფორმაცია ჯანსაღი ცხოვრების წესის მნიშვნელობის, ასერტულობის, სოციალური წნეხის ამოცნობისა და გააზრების თაობაზე. შეხვედრები წარიმართა ინტერაქციული ფორმატით და მოიცავდა როლურ თამაშებს, დისკუსიას, ანიმაციური ვიდეორგოლის ჩვენებასა და განხილვას, რაც მოზარდების ცნობიერების ამაღლებასა და პასუხისმგებლობიანი ქცევის განმტკიცებას ემსახურება.

კამპანიის ფარგლებში დაგეგმილია კონკურსების, ვიქტორინების, სპორტული ღონისძიებებისა და სხვა შემეცნებითი აქტივობების ჩატარება, რომლებიც მოზარდებში წაახალისებს ჯანსაღი ცხოვრების წესის დამკვიდრებას და გააძლიერებს მათ პასუხისმგებლობას საკუთარი ჯანმრთელობისა და მომავლის მიმართ.