საგანმანათლებლო დაწესებულების მანდატურის სამსახურის ორგანიზებით, მოსწავლეებისთვის ინტელექტუალურ-შემეცნებითი აქტივობები ჩატარდა

საგანმანათლებლო დაწესებულების მანდატურის სამსახურის ორგანიზებითა და ევროპის საბჭოს მხარდაჭერით, ქალაქ ქუთაისისა და მცხეთის მუნიციპალიტეტის საჯარო სკოლების მე-10 კლასის მოსწავლეებისთვის თანასწორობის თემაზე ინტელექტუალურ-შემეცნებითი თამაშები ჩატარდა.

სკოლებს შორის გამართულ შეჯიბრში ჩართულმა მოსწავლეებმა, ადამიანის უფლებების, თანასწორობისა და ბავშვთა უფლებების თემატიკაზე მომზადებულ კითხვებს უპასუხეს. ინტელექტუალურ-შემეცნებით თამაშებში გამარჯვება ანდრია რაზმაძის სახელობის ქალაქ ქუთაისის N41 ფიზიკა-მათემატიკის საჯარო სკოლის და ქალაქ მცხეთის  N1 საჯარო სკოლის მოსწავლეთა გუნდებმა მოიპოვეს.

ინტელექტუალურ თამაშებს საგანმანათლებლო დაწესებულების მანდატურის სამსახურის უფროსი პავლე მაჭარაშვილი დაესწრო. მან გამარჯვებულ მოსწავლეებს სერტიფიკატები, სამახსოვრო საჩუქრები და წიგნის მაღაზიის ვაუჩერები გადასცა. ღონისძიებას, ასევე ესწრებოდნენ საქართველოში ევროპის საბჭოს ოფისის წარმომადგენლები,  საგანმანათლებლო რესურსცენტრის ხელმძღვანელები და მასწავლებლები.

აღნიშნული ინტელექტუალურ-შემეცნებითი თამაშები თანასწორობის კვირეულის ფარგლებში გაიმართა, რომელსაც მანდატურის სამსახური მოსწავლეთა ცნობიერების ამაღლების მიზნით ყოველწლიურად ატარებს.