საგანმანათლებლო დაწესებულების მანდატურის სამსახურმა ქალთა მიმართ ძალადობის წინააღმდეგ ბრძოლის გლობალური კამპანიის ფარგლებში სხვადასხვა შემეცნებითი ღონისძიება განახორციელა

ქალთა მიმართ ძალადობის წინააღმდეგ ბრძოლის კამპანიის ფარგლებში, მანდატურის სამსახურის სოციალურმა მუშაკებმა და მანდატურებმა თბილისისა და რეგიონების საჯარო სკოლებში საინფორმაციო-საგანმანათლებლო შეხვედრები გამართეს. მათ სკოლის მოსწავლეებთან ქალთა მიმართ ძალადობის საკითხები, მათ შორის ადრეული ქორწინების საფრთხეები და პრევენციის მექანიზმები განიხილეს.

შეხვედრების ძირითადი მიზანი იყო მოსწავლეების ინფორმირება დახმარების მიღების არსებული რესურსების, სკოლაში ძალადობის პრევენციისა და უსაფრთხოების უზრუნველყოფის საშუალებების შესახებ.

კამპანიის ფარგლებში, ასევე გაიმართა მოსწავლეთა მიერ, ქალთა მიმართ ძალადობის წინააღმდეგ ბრძოლის თემაზე მომზადებული პოსტერებისა და ნახატების გამოფენა.

ქალთა მიმართ ძალადობის წინააღმდეგ გლობალური კამპანია, რომელიც ყოველწლიურად ტარდება, მიზნად ისახავს საზოგადოების ცნობიერების ამაღლებას ქალებისა და გოგონების უსაფრთხოების ხელშეწყობის, მათი უფლებების დაცვისა და ძალადობის პრევენციის მიმართულებით.

მანდატურის სამსახური ყოველწლიურად აქტიურად ერთვება აღნიშნულ კამპანიაში და ხელს უწყობს სკოლებში უსაფრთხო, ინკლუზიური და ძალადობისგან თავისუფალი საგანმანათლებლო გარემოს გაძლიერებას.