მანდატურის სამსახურის უფროსმა ევროპის საბჭოს პროექტის მმართველი კომიტეტის შეხვედრაში მიიღო მონაწილეობა

საგანმანათლებლო დაწესებულების მანდატურის სამსახურის უფროსმა, პავლე მაჭარაშვილმა ევროპის საბჭოს პროექტის „ბავშვთა მიმართ ძალადობის წინააღმდეგ ბრძოლა საქართველოში“ მმართველი კომიტეტის შეხვედრაში მიიღო მონაწილეობა. ღონისძიების მონაწილეებს პავლე მაჭარაშვილმა მისასალმებელი სიტყვით მიმართა და ისაუბრა იმ მნიშვნელოვანი პროგრესის შესახებ, რომელსაც უწყებამ აღნიშნული პროექტის ფარგლებში მიაღწია.

შეხვედრის მონაწილეებმა განხორციელებული აქტივობები და ის სამომავლო გეგმები განიხილეს, რომლებიც ბავშვთა უფლებების დაცვის მექანიზმების გაძლიერებას ისახავს მიზნად. ევროპის საბჭოს საერთაშორისო ექსპერტებმა დამსწრე საზოგადოებას წარუდგინეს მანდატურის სამსახურის სპეციალისტებისთვის შემუშავებული ორი ახალი სახელმძღვანელოს პროექტი, რომელიც სექსუალური ძალადობის მსხვერპლ ბავშვებთან მუშაობის სპეციფიკურ მიდგომებს ეხება.

აღნიშნულ სამუშაო შეხვედრაში მონაწილეობდნენ ევროპის საბჭოს საქართველოსა და სტრასბურგის ოფისის, საქართველოს გენერალური პროკურატურის, შინაგან საქმეთა სამინისტროს, პარლამენტის, მთავრობის ადმინისტრაციისა და სახალხო დამცველის აპარატის წარმომადგენლები.

სსიპ საგანმანათლებლო დაწესებულების მანდატურის სამსახური საქართველოში ევროპის საბჭოს ოფისთან 2019 წლიდან მჭიდროდ თანამშრომლობს, რაც ხელს უწყობს საგანმანათლებლო სივრცეში უსაფრთხოებისა და ბავშვთა კეთილდღეობის მაღალი სტანდარტების დანერგვას.