მანდატურობის კანდიდატებმა საზოგადოებრივი უსაფრთხოებისა და პოლიციის აკადემიაში მოსამზადებელი კურსი წარმატებით დაასრულეს

თბილისისა და რეგიონების საჯარო სკოლებში უსაფრთხოებისა და მოსწავლეთა კეთილდღეობის უზრუნველსაყოფად მანდატურის სამსახურს 33 ახალი მანდატური შეემატა.

მანდატურობის კანდიდატებმა საზოგადოებრივი უსაფრთხოებისა და პოლიციის აკადემიაში გამართული ინტენსიური მოსამზადებელი კურსის ფარგლებში შეიძინეს როგორც თეორიული, ისე პრაქტიკული ცოდნა. მათ შეისწავლეს ბავშვთა და მოზარდთა განვითარების ფსიქოლოგია, სამართალდარღვევებზე რეაგირების მექანიზმები, ადმინისტრაციულ და სამართალდამცავ უწყებებთან თანამშრომლობის საკითხები, ასევე ოჯახში ძალადობისა და ბავშვთა დაცვის მიმართვიანობის (რეფერირების) პროცედურები. ამავდროულად, განივითარეს ეფექტიანი კომუნიკაციისა და კონფლიქტების მართვის პრაქტიკული უნარები.

სასწავლო კურსის წარმატებით დასრულება კანდიდატებს მანდატურის სამსახურის უფროსმა პავლე მაჭარაშვილმა და საზოგადოებრივი უსაფრთხოებისა და პოლიციის აკადემიის რექტორის მოვალეობის შემსრულებელმა გიორგი ოსაძემ მიულოცეს. 

ღონისძიებაზე ხაზგასმით აღინიშნა მანდატურის მნიშვნელოვანი როლი თითოეული მოსწავლისა და სასკოლო საზოგადოების უსაფრთხო და მხარდამჭერი გარემოს უზრუნველყოფაში. პავლე მაჭარაშვილმა საზოგადოებრივი უსაფრთხოებისა და პოლიციის აკადემიას მრავალწლიანი და ნაყოფიერი თანამშრომლობისთვის მადლობა გადაუხადა.