საგანმანათლებლო დაწესებულების მანდატურები აღდგენითი მიდგომისა და სასკოლო მედიაციის საკითხებზე ტრენინგს გადიან

საგანმანათლებლო დაწესებულების მანდატურების გადამზადება აღდგენითი მიდგომისა და სასკოლო მედიაციის საკითხებზე ეტაპობრივად მიმდინარეობს. ტრენინგს წლის ბოლომდე ყველა მანდატური გაივლის.

ტრენინგის მიზანია სკოლებში კონფლიქტების, ბულინგისა და დისციპლინური გამოწვევების პრევენციისა და ეფექტიანი მართვის ხელშეწყობა, ასევე მანდატურებისთვის სასკოლო მედიაციის ძირითადი პრინციპებისა და პრაქტიკული მექანიზმების გაცნობა.

მონაწილეები გაეცნობიან მედიაციის არსს, მიზნებსა და პრინციპებს, პროცესის დაწყების საფუძვლებს, პროცედურებსა და ვადებს. განსაკუთრებული ყურადღება ეთმობა შემთხვევების მედიატორთან გადამისამართების საკითხს.

ტრენინგებს მანდატურის სამსახურის ფსიქოლოგები და სოციალური მუშაობის სპეციალისტი უძღვებიან. ისინი აღნიშნულ საკითხებში სპეციალურად გადამზადებული პრაქტიკოსი მედიატორები არიან.

ტრენინგის ერთ-ერთი მნიშვნელოვანი მიმართულებაა მანდატურებსა და სამსახურის სპეციალისტებს შორის კოორდინაციისა და თანამშრომლობის გაძლიერება. ინფორმაციის დროული გაცვლა, გამოცდილების გაზიარება და შეთანხმებული მოქმედება ხელს შეუწყობს სკოლებში მოსწავლეებისთვის უსაფრთხო და მხარდამჭერი გარემოს განმტკიცებას.

ტრენინგის მონაწილეებს მანდატურის სამსახურის უფროსი პავლე მაჭარაშვილი შეხვდა და თანამშრომელთა კვალიფიკაციის ამაღლებისა და პროფესიული უნარების გაძლიერების მნიშვნელობაზე ისაუბრა. მისი თქმით, მანდატურების პროფესიული განვითარება აუცილებელია მათი საქმიანობის ეფექტიანობისა და თანამშრომლობაზე დაფუძნებული გარემოს გასაძლიერებლად.

მანდატურის სამსახური თანამშრომელთა კვალიფიკაციის ამაღლებასა და პროფესიული კომპეტენციების განვითარებაზე ორიენტირებული ტრენინგების განხორციელებას მომავალშიც გააგრძელებს.